Cəlilabadda yol qəzasında 3 nəfər yaralanıb

Cəlilabadda 3 nəfərin yaralanması ilə nəticələnən yol-nəqliyyat hadisəsi baş verib. Hadisə sentyabrın 7-də Ələt-Astara magistralının 138-ci kilometrliyində, yolun Cəlilabad şəhərindən keçən hissəsində qeydə alınıb. Cəlilabadın Qarazəncir kənd sakini, 44 yaşlı Zabil Hüseynovun idarə etdiyi “VAZ-2106” markalı minik avtomobili hərəkətdə olarkən əks tərəfdən gələn Biləsuvar rayon sakini, 37 yaşlı Ramin Gülhəsənovun idarə etdiyi “Mercedes” markalı minik avtomobili ilə toqquşub. Güclü zərbə nəticəsində hər iki avtomobilə ciddi ziyan dəyib. “Mercedes”in sürücüsü qəzadan xətərsiz ötüşsə də, “VAZ-2106”ın sürücüsü və daha iki sərnişini, Cəlilabad rayon sakinləri olan 33 yaşlı Ramin Rzayev və 36 yaşlı Nemət Zərbəliyev müxtəlif dərəcəli bədən xəsarətləri ilə Cəlilabad Mərkəzi Rayon Xəstəxanasına yerləşdiriliblər. Xəstəxanada yaralılara müvafiq tibbi yardım göstərildikdən sonra vəziyyətləri stabil qiymətləndirilir. Faktla bağlı araşdırma aparılır. APA