Nəhəng yük maşını ötmə əməliyyatını gecikdirib «TIR»-la toqquşdu

Bakı-Qazax avtomagistralının 464-cü kilometrliyində ağır yol nəqliyyat hadisəsi  baş verib. Ağstafa rayonunun Aşağı Göycəli kəndi ərazisində iri yük avtomobillərinin toqquşması nəticəsində sürücülərdən biri ağır yaralanıb. Qazax rayon Kosalar kənd sakini, 43 yaşlı Binnət Əhmədov idarə etdiyi "MAN" markalı avtomaşınla ötmə əməliyyatını düzgün həyata keçirmədiyindən qarşıdan gələn Türkiyə vətəndaşı Tuncay Ayazın idarə etdiyi «TIR»-la toqquşub. «TIR»-ın sürücüsü öz yolu ilə  Qazaxdan Bakı istiqamətində getdiyini və qarşıdan gələn avtomaşının onun üzərinə doğru gəlib toqquşduğunu bildirib. Nəticədə "MAN" markalı avtomobilin sürücüsü müxtəlif bədən xəsarətləri alaraq Ağstafa rayon Mərkəzi Xəstəxanasına çatdırılıb. Həkimlər xəstənin vəziyyətinin orta ağır kimi  qiymətləndirirlər. Faktla bağlı araşdırma aparılır.