Qəribə yol qəzası: maşınlar və yaralılar “yoxa çıxdı”

Bakının Binəqədi rayonu ərazisində qəribə yol qəzası baş verib. APA TV-nin məlumatına görə, hadisə Hökməli dairəsində qeydə alınıb. “Shacman” markalı yük maşını dairədə “Mercedes” və “Azsamand” markalı minik avtomobillərini vurub. Qəzadan dərhal sonra “Shacman” və “Mercedes”, eləcə də, sayı hələ dəqiq məlum olmayan yaralılar hadisə yerindən uzaqlaşdırılıb. Ərazidə yalnız “Azsamand” və yaralılara məxsus olduğu ehtimal edilən ayaqqabılar qalıb. Binəqədi Rayon Polis İdarəsinin əməkdaşları hadisə yerinə gəlsələr də, nə maşınları və sürücüləri, nə də yaralıları tapa biliblər. Dövlət Yol Polisi İdarəsi qəzaya uğrayan avtomobillərin axtarışına başlayıb. Səhərə yaxın isə Abşeron Rayon Polis İdarəsinə məlumat daxil olub ki, xəstəxanaya yıxıldığı bildirilən yaralı gətirilib. Lakin onun xəsarətləri yıxılmağa yox, yol qəzasına daha çox uyğun gəlib. İstintaqçılar həmin şəxsin məhz Hökməli dairəsindəki qəzada xəsarət aldığını ehtimal edirlər. Hazırda faktla bağlı araşdırmalar davam etdirilir.