Avtobusda sərnişinin kartından bir bilet üçün 29 dəfə pul tutulub - FOTOFAKT

Avtobusda “Birbank” tətbiqi vasitəsilə bilet alan sərnişinin kartından ardıcıl olaraq 29 dəfə vəsait çıxılıb. Avtosfer.az "Konkret.az"a istinadən xəbər verir ki, bu barədə tanınmış jurnalist Vüsal Məmmədov sosial şəbəkə hesabında paylaşım edib. O bildirib ki, əgər hesabdakı məbləğ bitməsəydi, kartdan hətta daha çox pul çıxılacaqdı. Jurnalistin sözlərinə görə, sərnişin məsələ ilə bağlı “Kapital Bank”a müraciət edib. Bankdan ona “BakuBus”a müraciət etməsi tövsiyə olunub. “BakuBus” isə məsuliyyət daşımadıqlarını bildirərək “141” qaynar xəttinə yönləndirib. “141” xidmətindən isə sərnişinə *4343 nömrəsinə zəng etməsi məsləhət görülüb. Sərnişin əlavə olaraq bu zəng üçün 1 manat 20 qəpik xərcləyib. Lakin ona “həftəsonudur, bazar ertəsi əlaqə saxlayın” cavabı verilib.

Vüsal Məmmədov məsələ ilə bağlı aidiyyəti qurumların laqeyd münasibətini tənqid edib: 

“Əvvəla, işinizi düzgün qurun! İkincisi, vətəndaşın şikayətinə düz-əməlli cavab verin, ötür-ötür oyunu oynamayın! Sizin yarıtmaz işinizə görə insanın həm vaxtı getməlidir, həm pulu, həm də əsəbləri?!”. Jurnalist vətənfaşlara imkan daxilində nəqliyyat kartlarından istifadə etməyi tövsiyə edib.

Fotoları təqdim edirik: