Bakı-Sumqayıt dəmir yolundan yeni xəbər var - VİDEO

Sumqayıt Sərnişin Stansiyasında məskunlaşan 40-dan çox məcburi köçkün ailəsi stansiyadan köçürüləcək. Bu, Bakı-Sumqayıt dəmiryol xəttində yenidənqurma işlərinin aparılması ilə əlaqədardır. Qaçqınların və Məcburi Köçkünlərin İşləri üzrə Dövlət Komitəsi ilə bu istiqamətdə danışıqlar da aparılıb və köçürülmə ilə bağlı ailələrin razılıqları alınıb.

Bu arada Bakı-Sumqayıt dəmiryol xəttində yenidənqurma işləri daha da sürətləndirilib. Yeni qatarları qəbul etmək üçün artıq dəmiryolu xətlərində də təmir işləri başa çatmaq üzrədir. Belə ki, 63 kilometrlik dəmiryolu xəttinin 53 kilometri tam hazırdır. Son tamamlama işləri isə Sumqayıt vağzalı ətrafında görülür.

Yeni gətirilən qatarların qabaritləri köhnə elektrik qatarlarından böyük olduğundan Bakı sərnişin stansiyası da bu qatarlara uyğunlaşdırılıb. Bakı sərnişin stansiyasında da təmir-tikinti işləri sürətlə davam etdirilir. Burda stansiya ölkəmizə yeni gətirilən iki mərtəbəli qatarların dizaynına uyğun tərtib edilib. Artıq yeni platformalar tikilib və dəmir yolu reysləri dəyişdirilib. İşlərin davamı olaraq rabitə siqnalzasiya sistemi də yenilənəcək. Burda bütün işlərin ən qısa zamanda başa çatdırılacağı gözlənilir.