Bu avtobuslar ilk olaraq bu xətt üzrə hərəkət edəcək - VİDEO

“BakuBus” ilk marşrut xəttini istifadəyə verəcək. Avtosfer.az-ın «BakuBus» MMC-nin rəsmi “Facebook” səhifəsinə istinadla verdiyi məlumata görə, bu marşrut xətti sentyabrın 7-dən etibarən sərnişinlərə xidmət göstərəcək. İlk 1 nömrəli marşrut xətti «28 May»-«Koroğlu» metrostansiyaları istiqaməti üzrə hərəkət edəcək.  Yeni marşrut xəttində gediş haqqı 0.20 AZN olacaq. Sərnişinlərin sıxlıq təşkil edəcəyi dayanacaqlarda BakuKart terminalı olacaq.

«BakuBus» bu il iyunun 10-dan etibarən Hava Limanı – «28 May» metrostansiyası və əks istiqamət üzrə "Ekspress xətt"ini istifadəyə verib. Bu xətt üzrə işləyən marşrutlarda gediş haqqı 1,50 AZN təşkil edir. Ödəniş kart sistemi ilə həyata keçirilir. Avtobuslar «28 May» metrostansiyası çıxışındakı dayanacaqlarda 30 dəqiqə intervalla 24 saat sərnişinlərə xidmət göstərir.

"BakuBus" MMC Azərbaycan Nazirlər Kabinetinin 3 aprel 2014-cü il 92 nömrəli qərarına əsasən, Bakı şəhər İcra Hakimiyyətinin tabeliyində yaradılıb. Bakı şəhərində sərnişinlərə avtobus nəqliyyatı sahəsində beynəlxalq standartlara uyğun xidmətin təşkili, bu sahənin müasir tipli nəqliyyat vasitələri ilə təchiz edilməsi, sərnişin daşımalarının yerinə yetirilməsi zamanı texniki və ekoloji baxımdan təhlükəsizliyin təmin olunması əsas məqsədlər olaraq qarşıya qoyulub.

Bu avtobuslar ölkəyə ilk olaraq Avropa Oyunları üçün gətirilib. İlham Əliyev avtobus deposu və təlim mərkəzinin açılışında iştirak edib.

“BakuBus” MMC-nin avtoparkı Fransa istehsalı olan 151 “İveco Crealis” və 151 “İveco Urbanway” markalı avtobuslarla təchiz olunub.

Fidan