Qadınla kişi eyni motosikletdə gedə bilməyəcək

İndoneziyada kişilərlə qadınların eyni motosikletdə yol getmələri qadağan edilib. Avtosfer.az-ın anspress-ə istinadən məlumatına görə, Açex əyalətində nəqliyyatdan istifadə qaydalarını ağırlaşdırmaq niyyətindədirlər. "2013-cü ildə qadınlara kişilərlə bir motosikletdə getməyi qadağan edən qanun qəbul edilib. Amma buna əməl olunmur", - deyə İndoneziyanın Açex əyalətinin qanunverici orqanının üzvü Fauzan Hamza bildirib.

Qeyd edək ki, İndoneziyada Açex yeganə əyalətdir ki, sərt şəriət qaydaları tətbiq edilir. Burada qızlarla oğlanların bir yerdə təhsil almaları qadağandır. Bundan başqa, Açexdə hər axşam məcburi şəkildə Quran oxunması haqqında qanun da qəbul edilib. Əyalətdə şəriət qaydaları 2005-ci ildən tədbiq edilir. Bununla da mərkəzi hakimiyyətlə Açex əyaləti separatçıları arasında 30 illik vətəndaş müharibəsinə son qoyulub. Buna qədər əyalət müstəqil dövlət olmaq uğrunda mübarizə aparırdı.