Salyanda yarımçıq qalmış körpünün tikintisi davam etdirilir - VİDEO

Kür çayı üzərində  inşa edilən, lakin  tikintisi yarımçıq qalmış körpü yenidən tikilir. APA TV-nin məlumatına görə, körpü Salyan şəhəri ilə Babazənan yaşayış massivini birləşdirəcək. Tikinti işlərinin bu ilin axırına başa çatdırılması nəzərdə tutulur. Əraziyə müxtəlif təyinatlı texnikalar və 20 nəfərdən çox işçi qüvvəsi cəlb edilib. Həmin ərazidə gələcək daşqınların qarşısını almaq məqsədilə uzunluğu 250 metr olan bənddə  sahilbərkitmə işləri aparılır. Uzunluğu 24 metr olan dəmir-beton  tirlərlə körpünün axırıncı aşırımı quraşdırılır.

Uzun müddətdir ki, yaşayış massivinin əhalisi çayı qayıqla keçir, ya da dolayı yolla uzun məsafə qət etməli olurlar. Bu, həm təhlükəli, həm də əlavə vaxt itkisidir. Körpü hazır olduqdan sonra 7 minlik əhalisi olan Babazənan yaşayış massivinin sakinlərinin problemlərinə birdəfəlik son qoyulacaq.

Layihəyə əsasən, yeni tikilən körpünün uzunluğu 216 metr, eni isə 14,5 metrdir. Hər iki tərəfdən eni 1,5 metr olan piyadalar üçün gediş-gəliş zolağı da nəzərdə tutulub.