Sürücülərə ŞAD XƏBƏR: Bakıda 8 zolaqlı yeni yolda işlər başa çatır - VİDEO

Ötən həftə təmirə bağlanan Neftçilər prospektinin Nobel prospekti ilə birləşdiyi hissədə işlər tamamlanmaq üzrədir. Kanalizasiya, drenaj sistemi sıradan çıxan yol yağış sularının yığılması nəticəsində dağılıb. Kanalizasiya, drenaj sistemi yenidən qurulan yolun asfalt örtüyü yeniləndikdən sonra sürücülərin istifadəsinə veriləcək.

Paytaxtdakı bir başqa yenilik isə Nobel prospektinə paralel çəkilmiş dənizkənarı avtomobil yoludur. 8 hərəkət zolağından ibarət olan yolda son tamamlama işləri həyata keçirilir.

“Azəryolservis” ASC-nin mətbuat xidmətinin rəhbəri Anar Nəcəflinin APA TV-yə verdiyi məlumata görə, Nobel prospektinə paralel çəkilmiş dənizkənarı avtomobil yolunun ümumi uzunluğu 2 km-ə yaxın, eni 45 metrdir. Yolun 8 hərəkət zolağından biri avtomobillərin park edilməsi və dayanacağa giriş-çıxış üçün nəzərdə tutulub. Bundan başqa yolda 3 yeraltı piyada keçidi tikilib. Tikintisinə 2013-cü ilin may ayında başlanılan yolda işlərin 99 faizə qədəri həyata keçirilib. Hazırda yolda və yeraltı piyada keçidlərində son tamamlanma işləri aparılır. Bir neçə gündən sonra yol sürücülərin istifadəsinə veriləcək. Bütün bu işlər Nobel və Neftçilər prospektinin hərəkət yükünün azaldılmasına hesablanıb.