Sürücülərin nəzərinə- “Parking”də yenilik - VİDEO

"Avtomobilimi harda park edim?" və ya "tıxaca düşməmək üçün hansı yolla gedim?"... Bu tipli suallar paytaxtda sürücülər üçün həmişə aktualdır. Ancaq yaxın vaxtlarda belə sualların cavabını tapmaq daha asan olacaq. Əlbəttə ki, hazırlanan layihə icra olunsa. Söhbət yolların sıxlıq vəziyyəti və parketmə yerləri ilə bağlı məlumatları mobil telefona göndərən sistemdən gedir. 

Bakıda parketmə üçün vaxt itkisi olmayacaq. Mütəxəssislərin araşdırmaları göstərir ki, böyük şəhərlərdə tıxacların 30 faizini park etməyə yer axtaran sürücülər yaradır. Belə ki, sürücülər öncədən harda boş yer olduqlarını bilmədikləri üçün müəyyən ərazidə dəfələrlə dövrə etməli olurlar. Bu isə həm onların vaxt itirməsinə, həm də hərəkət etdikləri zaman həmin ərazidə tıxacların yaranmasına səbəb olurlar. 

Yeni texnologiya məhz bu problemi ortadan qaldıracaq. Parketmə yeri axtararkən əlavə vaxt itirməmək üçün dünyanın inkişaf etmiş ölkələrində tətbiq olunan sistemlərdən biri də mobil aplikasiyalara əsaslanır. Bu sistemə əsasən, şəhərdəki boş parketmə yerləri barədə məlumat birbaşa mobil telefona gəlir.

Quraşdırıldığı küçədə avtomobil sıxlığını da avtomatik təyinetmə funksiyasına malik olan sistem, istifadəçiləri tıxac və təmirə bağlanan yollar barədə də xəbərdar edir. Hazırda yeni sistem layihə şəklində aidiyyəti qurumlara təqdim edilib. Təklif qəbul olunsa, qısa müddətdə Bakıda istifadəyə veriləcək.

Xəzərxəbər