Bu küçədə səki illərdir parkinqə çevrilib - FOTO

Şəkildə əks olunan ərazi avtomobil yolu deyil, piyadalar üçün nəzərdə tutulmuş səki hissəsidir. Lakin mövcud vəziyyət tamamilə fərqlidir. Reallıqda bu səki parkinqə çevrilib və piyadaların hərəkəti avtomobillərin arasında, yolun ortasına sıxışdırılıb.

Avtosfer.az xəbər verir ki, Bakının Nərimanov rayonu Əhməd Rəcəbli küçəsinin böyük bir hissəsi avtomobillər üçün parkinqə çevrilib. Uzun illərdir davam edən bu proses artıq piyadalar üçün də adi hala çevrilib. Lakin müşahidələr göstərir ki, səkinin bu formada istifadəsi piyadaları birbaşa risk altına salır. Vətəndaşlar uşaq arabası ilə, əlil arabasında hərəkət edən şəxslərlə və ya yaşlı valideynləri ilə birlikdə təhlükəli şəkildə avtomobil axınına qarışmağa məcbur qalırlar. Bu isə artıq sadəcə rahatlıq problemi deyil, açıq-aşkar təhlükəsizlik məsələsidir.

Bəzi sürücülər niyə klassik avtomobillərdən istifadəyə maraqlıdır? - ARAŞDIRMA

Belə hallarda küçə öz əsas funksiyasını itirir. Səki avtomobillər üçün dayanacaq yox, piyadalar üçün hərəkət məkanıdır. Avtomobilin rahatlığı piyadanın təhlükəsizliyindən üstün tutulduqda şəhər mühiti “insan ölçüsünü” itirir və ictimai məkan öz mahiyyətini dəyişir.

Qeyd olunur ki, problemin həlli yolları kifayət qədər aydındır. Səkinin fiziki qorunması üçün baryerlərin və bordürlərin quraşdırılması, parkinqin düzgün təşkili və bu sahədə effektiv nəzarət mexanizminin tətbiqi vacib hesab olunur. Əks halda, piyadaların hüquqları davamlı şəkildə pozulmaqda qalacaq.

Vurğulanır ki, bu cür mənzərəyə yalnız sözügedən ərazidə deyil, paytaxtın digər küçə və prospektlərində də rast gəlinir. Şəhər mühitində piyada sərbəst və təhlükəsiz şəkildə hərəkət edə bilmirsə, belə bir şəhərin funksional və yaşanılan olması ciddi sual altına düşür.

Eltac Zülfüqaroğlu