DYP rəhbərliyi göstəriş verdi: piyadavurmaların səbəbləri araşdırılır - FOTO - VİDEO

Bu gün Bakı şəhər Dövlət Yol Polisi İdarəsinin və Səbail rayon Dövlət Yol Polisi Şöbəsinin əməkdaşları rayon ərazisində piyadavurmalar baş verən ərazilərdə maarifləndirmə tədbiri keçiriblər. Tədbirin keçirilməsində əsas məqsəd piyadavurmaların qarşısını almaq, insanları maarifləndirmək və baş verən hadisələrin səbəblərini araşdırmaqdır.

Bayraq meydanı ətrafında keçirilən tədbirlər zamanı yol-hərəkəti qaydalarını pozan piyadalar Avtosfer.az-ın əməkdaşına bildiriblər ki, onlar bəzən məcburiyyət qarşısında qalıb bu qaydaları pozurlar.

Çünki ərazisində iki piyada keçidi olsa da bəzən eskalatorlar işləmir, gecələr qaranlıq olur və bəziləri qorxudan həmin keçidlərdən istifadə etmir.

Digər tərəfdən isə yaşlı insanlar Avtosfer.az vasitəsilə aidiyyəti dövlət qurumlarına müraciət edərək bildiriblər ki, keçidlərin avtobus dayanacaqlarından uzaq tikilməsi, eyni zamanda keçidin birinin bulvar ərazisinə çıxması və dayanacağa çatmaq üçün təxminən 500 metr məsafəni qət etmək ehtiyacı yarandığından vətəndaşlar məcbur qalıb yolu keçid olmayan ərazidən keçirlər.

Xüsusilə yaşlı insanlar bu qaydaları pozurlar. Ərazidə xidmət aparan polis əməkdaşları da bildirdilər ki, gün ərzində təxminən minə yaxın vətəndaş yolu keçir. Onların az bir hissəsi qayda pozur. Artıq aparılan maarifləndirmə işləri öz müsbət nəticəsini verir. Qaydalara əməl edən insanlar çoxdur.

Lakin yaşlı və xəstə olduğunu deyən insanlar keçidlərdən istifadə edə bilməmələrini keçidlərin standartlara uyğun olmaması, eskalatorların işləməməsi və dayanacaqlardan uzaq olması ilə əlaqələndirirlər. Təklif olunur ki, daha bir dayanacaq Bayraq meydanının qarşısında qoyulsun.

Keçidlərdə işıqlandırma və mühafizə sistemi təmin olunsun ki, insanlar keçidlərdən rahat şəkildə istifadə etsinlər.

Qeyd edək ki, son 10 gün ərzində Səbail rayonu ərazisində piyadavurma ilə nəticələnən 3 yol-nəqliyyat hadisəsi baş verib. Nəticədə iki nəfər ölüb, daha ikisi xəsarət alıb. Bu hadisələrlə əlaqədar Baş Dövlət Yol Polisi İdarəsinin rəhbərliyi həmin ərazilərdə müayinə aparılması, hadisələrin səbəblərinin araşdırılması barədə göstəriş verib. Hazırda işlər davam etdirilir.

Elməddin Muradlı

Orxan Əli

Avtosfer.az