Səbail rayonunda polislər şagirdlərin qonağı oldular - FOTO

Səbail Rayon Polis İdarəsinin və 9-cu Polis Bölməsinin təşəbbüsü ilə rayon ərazisindəki 132-134 saylı təhsil kompleksində “Narkomaniya bəşəriyyətin bəlasıdır”, “Zərərli vərdişlərə yox deyək!” mövzularında maarifləndirmə tədbiri keçirilib.  Avtosfer.az xəbər verir ki, şagirdlərlə görüşdə rayon İcra Hakimiyyətinin nümayəndələri, RPİ-nin veteranlar şurasının üzvləri, ictimaiyyət nümayəndələri, eləcə də pedaqoji heyət, narkoloq və  psixoloqlar da iştirak ediblər.

Səbail Rayon Polis İdarəsinin rəisi, polis polkovniki Cavid Muradov çıxşında bu gün bəşəriyyəti narahat edən məsələlərdən birinin narkomaniya olduğunu bildirərək,  “ağ ölüm” kimi az qala bütün dünyanı ağuşuna alan bu sosial bəlanın hər il çoxlu sayda insanın ölümünə səbəb olduğunu qeyd edib. O, Azərbaycan hökumətinin ümumbəşəri problemə çevrilən narkomaniyanın yayılmasının qarşısının alınması məqsədilə tədbirlər gördüyünü, ona qarşı mübarizədə dünya ölkələri və beynəlxalq təşkilatlarla birgə fəaliyyət göstərdiyini vurğulayıb. 

Rəis narkomanlığın yayılmasına, narkotik vasitələrin dövriyyəsinə qarşı mübarizədə ölkənin hüquq-mühafizə, o cümlədən daxili işlər orqanlarının gördüyü qətiyyətli tədbirlərdən, bu istiqamətdə ictimaiyyət arasında aparılan profilaktiki tədbirlərin əhəmiyyətindən danışaraq bildirib ki, istər valideynlər, istərsə də ictimaiyyətin nümayəndələri, öz gələcəyinə biganə olmayan insanlar bu sahədə fəal mövqe tutmalı, yeniyetmə və gənclərin sağlam həyat yaşaması üçün ciddi addımlar atmalıdır. 

9-cu Polis Bölməsinin rəisi, polis polkovnik-leytenantı Elsevər Qədirov öz  çıxsışında narkomanlıqla mübarizə üçün dövlət tərəfindən  bütün lazımi addımların atıldığını, xüsusən yeniyetmə və gənclərin məşğulluğu, yüksək təhsili, idmanla məşğul olmaları üçün hər cür şəraitin yaradıldığını diqqətə çatdırıb. O deyib ki, valideynlər, pedaqoji heyət, ümumilikdə gənc nəslin tərbiyəsi ilə məşğul olan hər kəs bu işə öz töhfəsini verməlidir.    

Tədbirdə çıxış edənlər gənclərə narkomaniyanın fəsadları haqqında ətraflı məlumat verib, sağlam həyat tərzi keçirmələrinin əhəmiyyətini onlara hərtərəfli izah ediblər.

“Narkomaniya bəşəriyyətin bəlasıdır!” adlı videoçarx nümayiş etdirilib, sonda məktəbliləri maraqlandıran suallar ətraflı cavablandırılıb.

Emin