Yol polisi Bakı-Sumqayıt marşurutlarında maarifləndirici reyd keçirib - FOTO

Ordumuzun əldə etdiyi şanlı qələbələr fonunda polis əməkdaşları da arxa cəbhədə gözlə görünməyən düşmən olan koronavirusla mübarizədə yorulmadan xidmətlərini davam etdirirlər.

Baş Dövlət Yol Polisi İdarəsinin əməkdaşları son günlər artan koronavirus infeksiyanının yayılmasının qarşısının alınması məqsədilə Sumqayıt şəhərində və DYP-nin stasionar YPX postlarında hərəkət iştirakçıları ilə növbəti dəfə nəzarət-profilaktik tədbirlər həyata keçiriblər.

Belə ki, Sumqayıt şəhər avtovağzalında və şəhərin ayrı-ayrı ərazilərində, eləcə də DİN BDYPİ-nin Saray qəsəbəsi ərazisində yerləşən stasionar postunda sərnişindaşıma ilə məşğul olan ictimai və taksi nəqliyyat vasitələrinin sürücüləri və sərnişinləri ilə maarifləndirmə xarakterli söhbətlər aparılıb, sanitariya-gigiyena və karantin rejimi qaydalarına əməl etməyin zəruriliyi, eyni zamanda döyüşən hərbiçilərimizə münasibətdə hər bir azərbaycanlının həkimləri məşğul etməmək kimi bir vəzifə daşıdığı, dünyanın epidemialoji çağırışlarına Vətənə xidmət niyyətilə cavab verməyin vətəndaşlıq borcu olduğu onların diqqətə çatdırılıb.

Sürücülərə bir daha xəbərdarlıq edilib ki, nəqliyyat vasitəsinə müəyyən edilmiş normalardan artıq sərnişin götürmək infeksiyanın yayılması və daha çox insanın yoluxması riskini artırır. Sürücü və sərnişinlərə tibbi masklaradan düzgün formada, yəni tənəffüs yollarını örtəcək şəkildə istifadə etmələri tövsiyə edilib.

Nəzarət qaydasında saxlanılan avtobuslarda tibbi maskadan istifadə etməyən sərnişinlərə xəbərdarlıq olunub, onlara tibbi maskalar paylanılıb, qaydalara riayət etməyən şəxslər barəsində isə inzibati qaydada protokollar tərtib edilib.

Təhlükəsizlik tədbirləri davam etdirilir.