Yol polisindən uşaqlara məsləhət: “Yaşlılara hörmət edin” - VİDEO

Uşaqların qaydaları, xüsusilə də yol-hərəkət qaydalarını bilməsi və öyrənməsi vacibdir. Baş Dövlət Yol Polisi də mütəmadi olaraq uşaqlarla qaydalar haqda maarifləndirici tədbirlər təşkil edir.

Avtosfer.az xəbər verir ki, bu çərçivədə Bakı Şəhər Dövlət Yol Polisi İdarəsinin baş inspektoru, polis mayoru Araz Əsgərli azyaşlılarla maarifləndirici söhbətlər aparıb.

O, söhbət zamanı yaşlı vətəndaşlardan birini görərək ona yaxınlaşıb. Baş inspektor uşaqlara bildirib ki, böyüklər daim hörmətini saxlamalı olduğumuz insanlardır: “Onlara hörmət etmək lazımdır ki, böyüdükdə sizə də hörmət etsinlər”.  

Daha sonra isə yaşlı vətəndaş uşaqlara məsləhət verib. O, bildirib ki, qanunlara riayət etmək lazımdır: “Bu sağlamlığımız üçün də önəmlidir. Polislər olmasa, biz olmarıq”

Bu zaman Araz Əsgərli vətəndaşa “Siz olmasanız, biz olmarıq” deyərək təşəkkür edib.

Qeyd edək ki, uşaqlarla belə söhbətlərin aparılması onların gələcəyi üçün çox mühüm rola malikdir.

Məhəbbət Tərlanoğlu