2 gündə 33 dəfə radara düşən qızın unutduğu məqam

Qəribə hadisə fransalı qızın başına gəlib. 

Avtosfer.az xəbər verir ki, sürücülük vəsiqəsini təzə almış qız dostlarının birindən radarların yerini öyrənir və bizim rayona işləyən sürücülərimiz kimi davranır. Yəni, radara çatdıqda sürəti azaldır, sonra isə tam qazla gedir.  Hər gün yaşadığı Bezanson şəhərindən yaxınlıqdakı Müluz şəhərinə gedib-gələn qız radara düşməməsi ilə fəxr edir. Lakin o, bir məqamı unutmuşdu. 

3 gün sonra evinə gələn məktublar qızı təəccübləndirir. Məlum olub ki, o, 2 gündə 33 dəfə radara düşüb. Axı o heç bir radarın yanından sürətlə keçməyib!

Qızın unutduğu məqam bu idi: yol üstündə olanlar adi sürətölçmə radarı deyil, orta sürət radarları imiş. Bu radarlar üçün başlanğıc sürətin heç bir əhəmiyyəti yoxdur. Onlar vaxtı ölçərək orta sürəti çıxarır. Bu xüsusiyyəti bilməmək gənc qıza 2500 avroya başa gəldi. 

Görəsən bizə belə radarlar quraşdırılsa hansı nəticə olar?

Vüqar