Avropalı ekspertlərin narahatlığı: Çin avtomobilləri bazarı çökdürə bilər - FOTO

Avropa İttifaqında Çin elektromobilləri 35+10 faizlik gömrük rüsumu tətbiq etməsi bu ölkənin istehsalı olan maşınların bazara girişinə ciddi baryer yaratmayıb. 

Avtosfer.az xəbər verir ki, indi Çindən “köhnə qitəyə” hibrid, xüsusən də doldurulabilən hibridlər (PHEV) kütləvi şəkildə ixrac edilir. Bu ixrac strategiyası isə özünü doğruldub.  Bu maşınların Avropaya ixracında 2024-cü ildə 20 faiz artım qeydə alınıb. İyul-oktyabr aylarında Avropaya 66 min ədəd PHEV tədarük edilib. Gələn il ixracın daha da böyüyəcəyi gözlənilir. Çünki bu texnikaya Avropada rüsum çox cüzidir.

Çinin doldurulabilən hibridləri aşağı qiymətə görə Avropa bazarında yer tuta bilib.  Məsələn BYD-in təqdim etdiyi “Seal U DM-I” Avropada 36 000 avroya təklif olunur. Bu, “Tiguan”dan 700 avro, “Toyota”nın ən ucuz hibridindən isə 10 faiz daha aşağı qiymətdir.  
Artıq indidən avropalı ekspertlər həyəcan təbili çalırlar. əgər BYD 20 min avroya “Qin PLus” modelini Avropa bazarına təqdim etsə, bazar çökəcək.

Vüqar Yaşaroğlu