Dizel mühərrikin “evini yıxan” vərdişlər

Dizel mühərrikli avtomobillər Azərbaycanda da kifayət qədər populyardır. Yanacağa qənaət məsələsinə görə bu mühərriklər çoxlarının marağına səbəb olur. 

Avtosfer.az xəbər verir ki, düzgün istismar şəraitində Dizel mühərrikləri problemsiz vərdişlər formalaşmalıdır.
İlk növbədə soyuq mühərrik işə salındıqdan sonra  dərhal hərəkətə başlamaq həm mühərriki, həm də transmissiyanı dağıdır. Mühərriki işə saldıqdan sonra 1-2 dəqiqə qızdıraraq sonra aşağı templə hərəkətə başlamaq lazımdır. Bu zaman turbokompressor da zərər görmür. Dizel mühərriklərinin ən müasirləri belə, kəskin sürətlənməni sevmir. 
Şəhər daxilində tez-tez dayanmalar və tıxacda hərəkət də mühərrikin ömrünü qısaldır. Lakin bu, artıq həyat ormasıdır. 
Dizel mühərrikin ömrünü qısaldan bir amil də keyfiyyətsiz yanacaq-sürtkü materiallarından və filtrlərsən istifadədir. Keyfiyyətsiz hava filtri turbokompressorun da işini çətinləşdirir. Dəfələrlə olub ki, hava filtri tutulduğu üçün kompressor karterdəki yağı sovuraraq yanma kamerasına ötürüb və mühərrik sıradan çıxıb. 
Bəzən sürücülər “ustaların” məsləhəti ilə mühərrikin yağını çox gec – 10 min ilometr və daha böyük intervalda dəyişirlər. Bu da mühərrikin tədricən sıradan çıxması ilə nəticələnir. Doğrudur, bu intervalı istehsalçıların çoxu məsləhət görür. Lakin bu qayda tıxacsız və intensivlik az olan, mühərrikin saatlarla yerində işləmədiyi, addımbaşı tormozlamaya ehtiyac olmayan şəhərlərdə keçərlidir.

Vüqar Yaşaroğlu