“Hyundai” və “KIA” müştərilərə 1. 3 milyard dollardan çox təzminat ödəyib - FOTO

2010-cu illərin əvvəlləri “Hyundai” və “KİA” üçün yüksəliş dövrü idi. Cənubi Koreyanın bu iki nəhəng avtomobil markası dünya bazarında sürətlə pay qazanır, keyfiyyət və dizayn baxımından rəqiblərinə meydan oxuyurdu.

Avtosfer.az xəbər verir ki, lakin arxa planda təhlükəli bir texniki problem səssizcə böyüyürdü və bu, nəhayət, milyonlarla avtomobili əhatə edən kütləvi geri çağırmaya və milyardlarla dollarlıq təzminata səbəb oldu.

Böhran necə baş verdi?

Hər şey ABŞ-da satılan bəzi modellərin mühərrikində qəfil nasazlıqlar və yanğın hallarının artması ilə başladı. Əsasən 2011-2014-cü illər arasında istehsal olunan “Hyundai Sonata” və “KİA Optima” modelləri bu riskə məruz qalan avtomobillər sırasında idi.

Şikayətlərin çoxalması ABŞ Milli Avtomobil Yolları Trafik Təhlükəsizliyi İdarəsini (NHTSA) hərəkətə keçməyə vadar etdi. Aparılan araşdırmalar nəticəsində məlum oldu ki, “Hyundai” və “KİA” mühərriklərin istehsalında ciddi texniki səhvə yol veriblər.

Texniki səhv nədən ibarət idi?

Mühərrik blokları istehsal zamanı düzgün təmizlənmədiyindən içəridə qalan metal yonqar qalıqları yağ kanallarını tıxayırdı. Bu, mühərrik hissələrinin yağsız qalaraq tez bir zamanda köhnəlməsinə və nəticədə qəfil sıradan çıxmasına səbəb olurdu. Mühərrik dayandıqda isə bəzi hallarda yanğın da baş verirdi.

Problem yalnız texniki deyildi. Araşdırmalar göstərdi ki, “Hyundai” və “KİA” problemi uzun müddət gizlətməyə çalışıb. Müştərilərə təhlükə barədə vaxtında məlumat verilmədiyi və geri çağırma proseslərinin gec başladıldığı iddia edilirdi. Şirkətlər könüllü bəzi modelləri geri çağırsa da, bu addımlar yetərli olmadı.
Nəticədə, “Hyundai” və “KİA” ABŞ-da 3,4 milyon avtomobili əhatə edən kütləvi geri çağırma proqramı həyata keçirdi. Bundan əlavə, təhlükəsizlik risklərini vaxtında bildirmədiklərinə görə onlara qarşı sinif iddiaları qaldırıldı.

Sonda şirkətlər müştərilərə ümumilikdə 1,3 milyard dollardan çox təzminat ödəməli oldu. Bu qalmaqal “Hyundai” və “KİA”-nın dünya üzrə etibarına ciddi zərbə vurdu. Həm texniki səhlənkarlıq, həm də məlumatı gizlətmək cəhdləri avtomobil sənayesində bu hadisəni “istehsal xətasının bahalı dərsi” kimi tarixə saldı.

Eltac Zülfüqaroğlu