Bu yol sakinlərin həyatı üçün təhlükəyə çevrilib - FOTO

Bakının Xəzər rayonu, Binə qəsəbəsində Vaqif Mirzəyev küçəsinə bu ilin əvvəlində yeni asfalt örtüyü çəkilib. Avtosfer.az xəbər verir ki, asfaltın üzərinə lazımi hərəkət tənzimləyici nişanlar çəkilsə də, kənarlarda sürət məhdudlaşdırıcı nişan və kamera kimi texniki vasitələr quraşdırılmayıb. Bu da bəzi sürücülərin sürət həddini aşaraq tez-tez qayda pozuntularına yol verməsinə gətirib çıxarır.

Demək olar ki, küçə ətrafındakı evlərin qapısı yola açılır və bu da sakinlərin həyatı üçün təhlükə yaradır. Küçənin bəzi yerlərində 1 maşın ancaq hərəkət edə bilir, üstəlik, sürət həddinin aşılması yol kənarıyla gedən piyadaların vurulması ilə nəticələnə, eyni zamanda qarşıdan gələn digər nəqliyyat vasitələri ilə toqquşa bilər.

Xatırladaq ki, həmin ərazidə bir neçə məktəb yerləşir ki, bu da təhlükənin miqyasını daha da böyüdür.

Ümid edirik, yayımladığımız xəbərdən sonra aidiyyəti qurumlar problemin aradan qaldırılması istiqamətində tezliklə lazımı addımlar atacaq.

Namiq Musayev