Tbilisidə narazılıq yaradan nişanlanma xəttiylə bağlı AYNA-dan AÇIQLAMA - VİDEO

Paytaxtın Tbilisi prospektində aparılan xətlənmə işləri bəzi sürücülərin narazılığına səbəb olub.

Bununla bağlı izləyicilərdən biri Avtosfer.az-ın “Whatsapp” adresinə videomaterial göndərib. Onun iddiasına görə, sözügedən prospektdə çəkilmiş təhlükəsizlik adacığı zolaqların sayını azaltdığı üçün sürücülərin rahat şəkildə hərəkətinə əngəl törədir. Sürücü bildirib ki, Qızıl Şərq küçəsindən Tbilisi prospektinə daxil olmaq üçün dəqiqələrlə tıxacda gözləyirlər. Prospektdən İzmir küçəsinə döndükləri zaman isə çətinlik çəkirlər.  

Məsələylə əlaqədar AYNA-nın mətbuat katibi Tural Orucov Avtosfer.az-ın sorğusuna cavab olaraq bildirib ki, bir istiqamət üzrə 3 zolağı olan Tbilisi prospektində marşrut avtobuslarının sərnişinlərə rahat və təhlükəsiz xidmət göstərməsi, onların mənzil başına vaxtında çatdırılması üçün xüsusi zolaq təşkil edilib: “Sözügedən yolda hərəkətin kanallaşdırılması üçün zolaqlar standartlara uyğunlaşdırılıb, yolun geniş hissələrində adacıqlar təşkil edilib. Müraciətdə göstərilən hissənin eni az olduğundan xüsusi xətlərlə hərəkət hissəsindən ayrılıb”.

Nərmin