Mis oğruları elektromobil sürücüləri üçün başağrısına çevrildi

Almaniya elektrikdoldurma stansiyalarının operatorları ciddi problemlə üzləşiblər. 

Avtosfer.az xəbər verir ki, mis oğruları onları hər ay ciddi zərərə salırlar. Bəzi günlərdə 70-dən çox məntəqədə doldurma avadanlıqları dağıdılıb. Oğruları ən çox doldurma avadanlığının kabelləri maraqlandırır. Bu kabellər xalis misdən olduğu çün metal qəbulu məntəqələrində tez alınır. 

Almaniyada metal tullantısı kimi misin 1 kiloqramı təxminən 40 avrodur. Lakin bu cür qeyri-leqal yolla metal əldə edənlər onu yarı qiymətinə satırlar. Doldurma məntəqələri yeni ehtiyat hissə sifariş verib təmiri başa çatdıranadək bir neçə gün keçir və şirkətlər ziyana düşür. Təmir briqadaları işləri icra edib çatdıra bilmir. 

Oğurluq elektromobil sahibləri üçün də problem yaradır. Onlar adətən evlərinə və iş yerlərinə yaxın yerlərdə doldurma apardıqları üçün çox vaxt planları pozulur, başqa məntəqələrə üz tutmalı olurlar.

Elektrikdoldurma stansiyalarının operatorları məntəqələrə müşahidə kameraları qoyulmasını təklif ediblər.

Vüqar