Polis Tesla Cybertruck sahibinin arzusunu gözündə qoydu

Tesla Cybertruck elektromobilinin yükgötürmə qabiliyyəti və çevikliyi hamıya məlumdur. Bu maşını gündəlik minik avtomobili kimi istifadə edənlər də az deyil.  Lakin bu pikapı hər ölkədə istismar etmək mümkün deyil. 

Avtosfer.az xəbər verir ki, sözügedən modelə Avropada da ciddi maraq olsa da, dilerlər onu gətirmirlər. Səbəb maşının Avropada sertifikasiyadan keçməməsidir. Tesla Cybertruck Avropanın təhlükəsizlik normalarına, xüsusən də piyadalarla bağlı normalara cavab vermədiyi üçün onun köhnə qitədə istismarı mümkün deyil. Maşıb ABŞ-da sertifikasiyadan keçib, lakin bu sertifikatlaşmanın bir çox parametri Avropaya uyğun deyil. 
Bununla belə, maşını ABŞ-dan sifariş edənlər də tapılır. Bu günlərdə bir Brüssel sakininin sifarişlə gətizdirdiyi Tesla Cybertruck modeli ölkədə əks-səda doğurub. Maşın əhalidə ciddi maraq doğurub, sahibi onu dost-tanışa göstərib. Lakin bu lovğalığın ömrü cəmi 3 gün çəkib.
Brüssel sakini maşını sənədləşdirmək istədikdə polisdən imtina cavabı alıb. Maşın Aİ-də sertifikatlaşmadığı üçün o, nömrə və qeydiyyat şəhadətnaməsi ala bilməyib. Polisdən bildirilib ki, bu maşını ümumi istifadədə olan yollarda sürməyə icazə verilmir. Həyətyanı sahədə sürməyə isə heç bir qadağa yoxdur. Növbəti dəfə yolda görüldüyü təqdirdə elektromobil cərimə meydançasına qoyulacaq. 
İndi sürücünün 2 seçimi var: ya modelin Avropada sertifikatlaşmasını gözləmək, ya da onu Avropadan kənara satmaq.

Vüqar Yaşaroğlu