Ustaya etibar edən qadın sürücünün avtomobili bu hala düşdü - FOTO

Bu qəribə hadisə Fransanın Var departamentində qeydə alınıb. Avtosfer.az xəbər verir ki, qadın sürücü avtomobilini təmir etdirmək üçün təmir sexinə gətirir. Usta da tanış idi. İş vaxtının sonu olduğu üçün usta təmiri sabaha saxlayacağını deyir. Qadın razılaşaraq evinə qayıdır. Həngamə bundan sonra qopur. 
Gecə saat 3 radələrində qadına naməlum nömrədən zəng gəlir. Danışan polis mayoru idi. Qadına onun avtomobili ilə ağır qəza törədildiyini deyərək hadisə yerinə çağırırlar. O, təyin olunan yerə gəldikdə özlərinə inanmır. 
Avtomobil qəzaya düşərək metal yığınına dönüb, maşın ustası isə yüngül xəsarətlə qəzadan sağ çıxıb. Məlum olur ki, iş qurtarandan sonra usta maşını da götürüb dostları ilə kef məclisinə gedib. 
Yerindəcə araşdırma zamanı məlum olub ki, maşın ustasının vəsiqəsi avtoxuliqanlığa görə 1 il əvvəl ləğv edilib. Qadının avtomobilinin sığortası isə 1 ay əvvəl bitib. Polis qadına yeganə çıxış yolunu göstərir: avtomobili metal tullantısı kimi təhvil vermək. 
Pis vəziyyətə düşən qadın avtomobilin utilizasiya məntəqəsinə aparılması üçün də evakuatora pul ödəyir. Səhər açıldıqda isə ilk işi ustaya qarşı etimaddan sui-istifadə ittihamı ilə  məhkəmə iddiası qaldırmaq olur.
Təmir müəssisəsinin ilk işi isə ustanın əmək müqaviləsinə xitam vermək olur. Qadın avtomobilindən oldu, məsuliyyətsiz usta da işindən.

Vüqar