Avtomobillər niyə bahalaşıb? - SƏBƏBLƏR

Ölkə ərazisində taksi fəaliyyəti ilə bağlı yeni qaydalar təsdiqləndikdən sonra avtomobil qiymətlərində artım müşahidə edilib.

Avtosfer.az xəbər verir ki, həm mütəxəssislər həm də avtomobilini satışa çıxaran şəxslər bunu təsdiqləyir.

Maşınını bazara çıxaran Eldar Vəliyev bildirib ki, taksi fəaliyyəti ilə bağlı qaydalar avtomobil sektorunda xeyli dəyişikliklərə səbəb olub.

“Hansı maşın istismara yararsızdırsa, onların qiymətləri düşüb. Hansının ki, ili 2015-2016-cı ildən yuxarıdır, qiymətində artım var”.

Təkcə ölkədaxili avtomobil bazarında yox, həm də ölkəyə gətirilən avtomobillərin qiymətində də artım müşahidə edilib. Dövlət Gömrük Komistəsinin rəsmi məlumatına əsasən, 2023-cü ilin əvvəlində ölkəyə gətirilən avtomobillərin orta qiyməti 15.121 ABŞ dolları idisə, bu ilin eyni dövründə məbləğ 19%-ə qədər artaraq 17.975 ABŞ dollarına qədər yüksəlib. Ölkəyə gətirilən hibrid avtobillərin orta idxal qiymətində də 36% artım sezilib.

Nəqliyyat eksperti Yasin Mustafayev deyib ki, ölkəyə gətirilən avtomobillərin istismar müddəti taksi fəaliyyətinə yararlı olduğu üçün, ümumilikdə avtomobil bazarında qiymət artımlarına səbəb olub.

“Ölkədə istifadə edilən avtomobillərin cəmi 20%-i 10 ildən yenidir. Qalan avtomobillər isə çox köhnə avtomobillərdir. Son dövrlərdə aparılan islahatlar ölkənin avtomobil parkının yenilənməsi məqsədi daşıyır”.

Ekspert onu da vurğulayıb ki, aparılan islahatlar qiymətlərin hələ uzun müddət artımına səbəb olacaq. Bu isə özünü daha çox minik avtomobillərində göstərəcək.

Səfər Əlizadə