Azərbaycan kartofu Rusiyada yerli məhsulu sıxışdırır

Rusiyada marketlər yerli və ucuz kartof əvəzinə daha baha olan Azərbaycan kartofuna üstünlük verir.

Avtosfer.az “vokrugsveta.ru” nəşrinə istinadla xəbər verir ki, Rusiyada yerli istehsal olan kartof daha ucuz və boldur. Buna rəğmən alıcılar xarici məhsula üstünlük verirlər. əsasən 3 ölkədən – Azərbaycan, Misir və Çindən kartof idxal edilsə də, Azərbaycan məhsulu yüksək qiymətə baxmayaraq rəqiblərini geridə qoyub. 

Rusiyalı ekspertlərin fikrincə, yerli məhsul ötən ildən qaldığı üçün keyfiyyətini və dadını itirib. O tez sıradan çıxır, ucuz alınsa da, saxlama xərci çox olduğundan ticarət şəbəkələri gəlir əldə edə bilmir.

Bunun əksinə, təzə Azərbaycan kartofunu saxlamaq üçün xüsusi şərait tələb olunmur. Üstəgəl, idxal da davam edir. 

Bununla belə, ekspertlər vəziyyətin çox davam etməyəcəyi qənaətindədirlər. Rusiyanın isti regionlarında bir aydan sonra kütləvi məhsul yığımı başlayacaq və idxaldan asılılıq azalacaq. 
Qeyd edək ki, bu vəziyyət həm də Azərbaycanla Rusiya arasında onilliklər ərzində formalaşmış iqtisadi münasibətlərin göstəricisidir. Yaz-yay mövsümündə şimal qonşumuza böyük həcmdə kartof satsaq da, qışda Belarus və Rusiyadan eyni məhsulu alırıq. Bu cür idxal-ixrac əməliyyatları hər 3 ölkə üçün iqtisadi cəhətdən əlverişlidir.

Vüqar