Avtomobilin üstünə binadan ətir qabı atılıb, maşına ziyan dəyib - VİDEO

Bakıda hərəkətdən olan avtomobilin üstünə çoxmərtəbəli yaşayıs binasından ətir qabı atılıb.

Hadisə ötən gün paytaxtın Səbail rayonu, Bayıl qəsəbəsində baş verib.

Sürücü Pərviz Qulamov deyir ki, Qurban Abbasov küçəsində gedərkən 16 mərtəbəli binadan ətir qabını onun maşınının üzərinə atıblar. Şüşə qab avtomobilin alın şüşəsinə düşüb. Bu zaman ön şüşə qırılıb.

Pərviz Qulamov həmin vaxt ətrafa boylanıb, amma şüşə qabı atan şəxsi tapa bilməyib. Sürücü deyir ki, şüşənin qırıq hissəsi avtomobili idarə etməkdə çətinlik yaratdığından, daha doğrusu görməni məhdudlaşdırdığından səhər saatlarında məcbur qalaraq təmir etdirib. 

Məsələ ilə bağlı Pərviz Qulamov polisə məlumat verməyib.

Səbail rayon 8-ci polis bölməsindən bildirildi ki, vətəndaş rəsmi qaydada müraciət etsə, həmin hadisə nəzəratə götürüləcək və araşdırılacaq.