Bakıda “moyka” işçisi maşın qaçırdı

Oktyabrın 25-də Binəqədi rayonunun M.Cəlal küçəsində yerləşən avtoyuma məntəqəsindən Bakı şəhər sakini Ulduz Aslanovaya məxsus “Hyundai” markalı avtomobil qaçırılıb.

Avtosfer.az xəbər verir ki, bu barədə DİN-dən bildiriblər. Məlumata görə, Bakı Şəhər Baş Polis İdarəsinin Təhlükəsiz Şəhər Xidməti və Dövlət Yol Polisi İdarəsi əməkdaşları tərəfindən keçirilmiş əməliyyat-axtarış tədbirləri ilə avtomobil 28 May küçəsində saxlanılıb.

Avtomobili idarə edən avtoyuma məntəqəsinin işçisi, Quba rayon sakini Sabir Orucov və qaçırılmış maşın 7-ci polis bölməsinə təhvil verilib.

Araşdırmalar aparılır.