Bakının mərkəzində hərəkət qismən məhdudlaşdırılıb – FOTOLAR

Bakının Neftçilər prospektinin Nobel prospekti ilə birləşən hissəsində nəqliyyatın hərəkəti qismən məhdudlaşdırılıb. Avtosfer.az-ın APA-ya istinadən məlumatına görə, yolun bir qisminin bağlanmasına səbəb ərazidəki dəmiryolu relslərinin yenilənməsidir. İşin icrası ilə bağlı əraziyə Dövlət Yol Polisinin əməkdaşları cəlb olunublar.

"Azeryolservis" ASC-nin ərazidə olan əməkdaşlarının verdiyi məlumata görə, dəmiryolu relslərinin dəyişdirilməsi ilə əlaqədar əraziyə lazımı texnika və canlı qüvvə cəlb olunub. Onların sözlərinə görə, Xəzər Dəniz Gəmiçiliyi tərəfindən sifariş verilən işin icrasını «Azərbaycan Dəmir Yolları» QSC və Nəqliyyat Nazirliyi "Azeryolservis" ASC-i həyata keçirir.

Qeyd edək ki, sözügedən ərazidə aparılan işlə bağlı Neftçilər prospektindən Nobel prospektinə girən sürücülərə xəbərdarlıq etmək məqsədi ilə monitorlar quraşdırılıb. Eyni zamanda, yola xüsusi xəbərdarlıqedici nişanlar düzülüb. Mərhələli şəkildə həyata keçiriləcək relslərin dəyişdirilməsi oktyabrın 19-da yekunlaşacaq.