Bakının yollarında yağış-kanalizasiya quyuları təmizlənir - FOTO+VİDEO

2015-2016-cı illər payız-qış mövsümünə hazırlıq, yol qurğularının normal istismarını, hərəkətin fasiləsizliyini və təhlükəsizliyini təmin etmək məqsədi ilə Nəqliyyat Nazirliyi “Azəryolservis” ASC tərəfindən hazırlanan tədbirlər planına uyğun olaraq, Bakı şəhərinin küçə və prospektlərində səth normal sularının kənarlaşdırılması üçün nəzərdə tutulmuş yağış-kanalizasiya quyularının təmizlənməsi işləri həyata keçirilir.

Avtosfer.az xəbər verir  ki, bu barədə “Azəryolservis” ASC-dən verilən məlumata görə, işlər çərçivəsində yol kənarlarında yerləşən yağış barmaqlıqları çıxarılır, yağış-kanalizasiya quyularının içərisi təmizlənir. Bundan başqa yağış barmaqlıqları olmayan yerlərdə yeni barmaqlıqlar qoyulur, dəyişilməyə ehtiyyac olanlar isə yenilərin ilə əvəzlənir. İşlər “Azəryolservis”in balansında olan və yağış-kanalizasiya sisteminin olduğu bütün küçə, prospektlərdə aparılır. “Azəryolservis” tərəfindən bu çərçivədə Ziya Bünyadov, Tbilisi, Azadlıq, Neftçilər, Heydər Əliyev və Nobel prospektlərində, Həsən Əliyev, Səməd Vurğun, Salamzadə, Bakıxanov, Ağa Neymətulla, Təbriz küçələrində, həmçinin Lökbatan dairəsi-Bibihetbət yolu, Binəqədi şosesi və Hava limanı istiqamətində başlanılan işlər artıq yekunlaşmaq üzrədir.

Bu istiqamətdə işlər nəinki Bakının küçə və prospektlərində, həmçinin respublikanın bütün avtomobil yollarında da həyata keçirilir. Belə ki, körpülər yerləşən ərazidə çayların yataqları, suötürücü boruların giriş-çıxış hissələri və küvetlər təmizlənir.

Qeyd edək ki, payız-qış mövsümü ilə əlaqədar “Azəryolservis” tərəfindən hazırlanan tədbirlər planına uyğun olaraq bütün işlər Nəqliyyat Nazirliyi və “Azəryolservis” rəhbərliklərinin nəzarəti altında uğurla davam etdirilir.