Binəqədidə bərbad vəziyyətə salınan səki bərpa olunur - RƏSMİ AÇIQLAMA - FOTO

Sentyabr ayının 24-ü Binəqədi rayonu Süleyman Sani Axundov küçəsində səkinin uzun müddətdir təmirsiz vəziyyətdə saxlanması ilə bağlı xəbər dərc etmişdik. Belə ki, “Dərnəgül” metrosu yaxınlığında  piyadaların hərəkəti üçün nəzərdə tutulan hissədə bir neçə ay əvvəl kommunikasiya xətlərinin təmiri işləri aparılıb. Təmir işlərinin qısa müddətdə yekunlaşmasına baxmayaraq, səkinin vəziyyəti bərpa edilməmişdi.

Məsələ ilə əlaqədar Binəqədi Rayon İcra Hakimiyyətindən Avtosfer.az-a verilən məlumatda bildirilib ki, hazırda qeyd edilən ünvanda səkinin təmir-bərpa işləri aidiyyəti qurum tərəfindən həyata keçirilir.

***

24.09.2024 - 15:20

***

Bakıda uzun müddət əvvəl təmir məqsədilə sökülən səkinin bərpası işlərini görmək unudulub.

Avtosfer.az xəbər verir ki, paytaxtın Binəqədi rayonu Süleyman Sani Axundov küçəsində piyadaların hərəkəti üçün nəzərdə tutulan hissədə təmir işlərini başa çatdırmayıblar.

Belə ki, “Dərnəgül” metrosu yaxınlığındakı ərazidə aylar öncə kommunikasiya xətləri üçün dağıdılan səki hələ də bərpa olunmayıb. “Olympus Park” yaşayış kompleksinin qarşısında yerləşən bu ərazi xüsusilə yağışlı günlərdə ciddi narahatlıqlara səbəb olur.

Dağıdılmış səkinin palçıqla dolması, ətrafda yaşayan sakinlər və piyadalar üçün çətinlik yaradır. Sakinlər, müvafiq qurumların problemin tezliklə həll olunmasını gözlədiklərini qeyd edirlər.

Səfər