Brüsseldə inteqrasiya və nəqliyyat məsələləri müzakirə edilir

Bu gün Belçikanın paytaxtı Brüssel şəhərində Avropa İttifaqı Şərq Tərəfdaşlığı proqramının “İqtisadi inteqrasiya və Avropa İttifaqı  siyasətinə uyğunlaşma” üzrə II çoxtərəfli platforması çərçivəsində Nəqliyyat panelinin növbəti iclası keçiriləcək.

Avtosfer.az xəbər verir ki, bu barədə oxu.az-a Nəqliyyat Nazirliyindən bildirilib.

Nazirlikdən bildirilib ki, müasir dövrdə  inteqrasiya proseslərinin və nəqliyyat əlaqələrinin ən aktual mövzularının müzakirə edildiyi tədbirdə Nəqliyyat Nazirliyi də təmsil olunacaq. 

Qeyd edək ki, noyabrın 16-da isə Türkiyənin İstanbul şəhərində Qara Dəniz İqtisadi Əməkdaşlıq Təşkilatı çərçivəsində Qara dəniz regionunda intermodal nəqliyyat üzrə əməkdaşlıq imkanlarının öyrənilməsinə dair İşçi Qrupunun iclası keçirilib. 

Azərbaycanın tranzit potensialının getdikcə gücləndiyi və intermodal daşımalara böyük əhəmiyyət verildiyi bir zamanda reallaşan bu müzakirələrdə həmçinin Nəqliyyat Nazirliyinin təmsilçisi də iştirak edib.