Doqquz ildir istifadəyə verilən körpü niyə işıqlandırılmır? - VİDEO

Kür çayının üzərində tikilən və 2017-ci ildə açılışı olan körpü işıqlandırılmır. Bu da qaranlıqda körpüdən istifadə edən sürücülər üçün böyük təhlükə yaradır. Poylu qəsəbəsinin ərazisində olan körpünün uzunluğu 200 metrdir. Baku TV-nin məlumatına görə, sürücülər körpüdən keçməklə Ağstafanın doqquz yaşayış məntəqəsinə, eləcə də Gürcüstanla sərhədə istiqamət alırlar. Onlar illərdir hökm sürən problemin həll olunmasını istəyirlər.

Sürücülərdən birinin sözlərinə görə, körpü strateji əhəmiyyət daşısa da, indiyədək işıqlandırma sistemi quraşdırılmayıb:

"8-9 ildir bu körpü tikilib, strateji əhəmiyyətli yoldur, amma işıqlandırılmayıb. Rayonun ən böyük körpüsüdür, amma işığı yoxdur. Daha kiçik körpülərdə belə işıq var. Təxminən 500 metr məsafədən körpünün başlanğıcı görünməlidir".

Məsələ ilə bağlı Ağstafa Rayon İcra Hakimiyyətindən bildirilib ki, sözügedən məsələ onların səlahiyyətində deyil. Azərbaycan Avtomobil Yolları Dövlət Agentliyinin Mətbuat Xidmətinin rəhbəri Anar Nəcəfli isə qeyd edib ki, körpü onların balansında olsa da, təhvil verildikdən sonra işıqlanma balansa daxil edilməyib.