Dörd gün niyə susuz qalacağıq? - SƏBƏB AÇIQLANDI

Oğuz-Qəbələ-Bakı magistral kəmərindəki qəzanın səbəbi məlum olub.

Bu barədə Azərbaycan Dövlət Su Ehtiyatları Agentliyinin (ADSEA) tabeliyindəki İri Şəhərlərin Birləşmiş Su Təchizatı Xidmətindən məlumat verilib.

"Oğuz-Qəbələ-Bakı magistral su kəməri şüşə lifli (GRP) borularla inşa olunub. Bu tip borular korroziyaya qarşı dayanıqlı olsa da, GRP borular spesifik texniki xüsusiyyətlərinə görə yüksək həssaslıq xarakteri daşıyır. Bu səbəbdən bəzi hallarda istismar zamanı təsirlər və ya hidravlik gərginliklər nəticəsində lokal qəzalar baş verə bilər", - deyə məlumatda qeyd olunub.

Məlumatda bildirilir ki, bu kimi hallarda qeyd olunmalıdır ki, təmir-bərpa prosesində əsas vaxt aparan proses birbaşa texniki təmir işlərindən daha çox, boru kəmərinin suyunun boşaldılması və yenidən doldurulması mərhələsidir:

"Belə ki, kəmərin tam boşaldılması 24 saatdan artıq vaxt tələb edir. Həmçinin eyni müddət ərzində borunun təzyiqə uyğun şəkildə yenidən su ilə doldurulması prosesi həyata keçirilir.

Bütün bu mərhələlər ciddi nəzarət altında və müvafiq təhlükəsizlik tədbirləri çərçivəsində aparıldığından qəza baş verdikdə ümumi bərpa müddəti nisbətən uzun zaman tələb edə bilir".

"Xüsusilə diqqətə çatdıraq ki, belə qəzalar zamanı bu kəmərdən qidalanan ünvanların alternativ su mənbələri ilə gün ərzində fasilələrlə su təchizatı həyata keçirilir. Eyni zamanda, kəmərin bərpası istiqamətində ərazi briqadası tərəfindən operativ və müntəzəm işlər icra olunur", - deyə açıqlamada bildirilib.(oxu.az)