DYP-nin qovduğu «07» 2 nəfərin həyatına qoydu - FOTOLAR

Bakının Nizami rayonu ərazisində, Heydər Əliyev prospektində 2 nəfərin ölümü, 3 nəfərin yaralanması ilə nəticələnən ağır yol-nəqliyyat hadisəsi ilə bağlı yeni məlumatlar yayılıb. Məlumata görə, Tural Rəhimovun idarə etdiyi «VAZ-2107» markalı avtomobil Aeroport şosesi istiqamətində hərəkətdə olarkən qəflətən geriyə dönüş edib və Heydər Əliyev prospekti ilə əks istiqamətdə hərəkət etməyə başlayıb. Bu vaxt VAZ-2107 qarşıdan gələn və 53 yaşlı Firdovsi Əliyevin idarə etdiyi «Lexus»la toqquşub. Hadisə nəticəsində VAZ-2107 markalı avtomobildə olan iki sərnişin ölüb, sürücü Tural Rəhimov, eləcə də, «Lexus»un sürücüsü Firdovsi Əliyev və onun həyat yoldaşı Arifə Əliyeva ağır bədən xəsarətləri alıblar. VAZ-2107-nin sürücüsünün yaxınları bildiriblər ki, Tural Rəhimov yol polisi əməkdaşlarından qaçmağa çalışırmış. Metronun «Koroğlu» stansiyasının qarşısında Yol Patrul Xidmətinə məxsus avtomobil Heydər Əliyev prospektini bağlayaraq, VAZ-2107-nin qarşısını kəsib. Tural Rəhimov isə geriyə dönüş edərək, əks istiqamətdə hərəkət edib və nəticədə toqquşma baş verib. Nizami Rayon Polis İdarəsinin müstəntiqi Nicat Naibov isə APA-ya açıqlamasında deyib ki, VAZ-2107-nin YPX əməkdaşları tərəfindən təqib edilməsi ilə bağlı iddialar araşdırılır. Müstəntiqin sözlərinə görə, ərazidəki təhlükəsizlik kameralarının görüntülərinə də baxış keçiriləcək və hadisənin təfərrüatları müəyyən ediləcək. "İlkin versiya bundan ibarətdir ki, VAZ-2107-nin sürücüsü avtoxuliqanlıq edib. 3 saylı şəhər Kliniki Xəstəxanasından bildirilib ki, VAZ-2107-nin sürücüsü Tural Rəhimovun vəziyyəti ağırdır və əməliyyat olunur. Hadisə nəticəsində ölənlərin şəxsiyyəti dəqiqləşdirilir.