Əfqanıstandan neçə nəfər təxliyyə olunub?

Qərb ölkələri təxliyyə müddəti ərzində Əfqanıstandan 140 min nəfərə yaxın insanı çıxarıb.

“Qafqazinfo” xəbər verir ki, bu barədə NATO-nun nümayəndəsi, Əfqanıstandan təxliyə üzrə mülki əməliyyatların kordinatoru Stefano Pontekorvo bu gün “Corriere della Sera” qəzetinə müsahibəsində bildirib.

O, təxliyyənin təşkilində bir sıra logistik problemlər olduğunu qeyd edib.

“Kabildən, adətən, gündə maksimum altı mülki və iki hərbi uçurdu. Biz 120 təyyarə göndərirdik. İki həftə ərzində illik həcmin 80 faizi qədər – 140 min sərnişin uçub”, - deyə İtaliya Hərbi Hava Qüvvələrinin son reysi ilə Romaya qayıdan diplomat vurğulayıb.

Onun fikrincə, Əfqanıstandan qaçqın axını qonşu ölkələrə yerüstü marşrutlarla davam edəcək, oradan onları qəbul etməyə hazır olan ölkələrə təyyarələr uçur.