Əfv Məsələləri Komissiyasının ikinci iclası keçirilib - Ən çox kimlər müraciət ediblər?

Prezident yanında Əfv Məsələləri Komissiyasının 2025-ci il üçün ikinci iclası keçirilib.

Avtosfer.az xəbər verir ki, bu barədə OxuaAz-a komissiyanın üzvü Rəşad Məcid məlumat verib.

O qeyd edib ki, iclasda yüzdən artıq müraciətə baxılıb:

"Bu gün Azərbaycan Prezidenti yanında Əfv Məsələləri Komissiyasının bu il üçün ikinci iclası keçirilib. İclası komissiyanın sədri Samir Nuriyev açıb. Əsasən, qəsdən adam öldürməyə cəhd, sağlamlığa ağır zərbə vurma, adam oğurluğuna cəhd, oğurluq və soyğunçuluq kimi cinayətlərlə bağlı məhkum olunmuş şəxslərin müraciətləri müzakirəyə çıxarılıb. Komissiya hər bir müraciətlə bağlı müzakirə apararaq səsvermə nəticəsində qərarlar qəbul edib. Komissiya növbəti həftələrdə öz işini davam etdirəcək".

"Əfv məsələləri Prezidentin müstəsna səlahiyyətidir, humanizm və mərhəmət aktıdır. Komissiya iclaslarını yekunlaşdırandan sonra müsbət rəy verilmiş sənədlər toplanaraq Prezidentə təqdim olunacaq. Yəqin ki, yaxın aylarda biz Prezident tərəfindən növbəti əfv sərəncamının imzalanmasının şahidi olacağıq", - deyə R.Məcid əlavə edib.