"Gorus-Qafan yolunun bağlanması son addım deyil" - AÇIQLAMA

"Ermənistan tərəfi  imzalanan  birgə  bəyanatın şərtlərini  9 ayda bu və ya digər şəkildə pozursa, o zaman  Azərbaycanın da bu bəyanatın şərtlərini  yerinə yetirmək kimi məsuliyyəti aradan qalxır". Bu sözləri unikal.org-a açıqlamasında  hərbi ekspert  Ədalət Verdiyev deyib. Ekspert bildirib ki,  Ermənistanın dolayısı yolla həmin ərazilərə silahlı qüvvələr yeritməsi və Rusiya sülhməramlılarının buna göz yumması Azərbaycanın daha radikal  addımlar atmağa vadar edir: "Ermənilər bu cür  addımlar atmaqla sanki Gorus-Qafan yolunun bağlanmasını israr etdilər. Digər  tərəfdən isə Ermənistan sentyabrın 2-də separatçı rejimin seçkilərinə hazırlaşır. Nə sülhməramlı qüvvələrdən, nə də  Ermənistan tərəfdən bu seçkilərin keçirilməsinin məqsədəuyğun olmadığı haqqında heç bir bəyanata rast gəlmirik. Separatçı rejim isə hazırlığını daha da intevsivləşdirir.  Ola bilsin ki, bu onları daha da cəsarətləndirir. Belə olan halda Azərbaycan da daha adekvat  addımlar ata bilər. Gorus-Qafan yolunun bağlanması son addım deyil. Əlimizdə kifayət qədər daha təsirli mexanizmlər var. Hesab edirəm ki, bu mexanizmləri işə salmazdan əvvəl rəsmi səviyyədə ultimatum səsləndirilməli və ya həmin seçkilərin həyata keçirilməsində Azərbaycanın imkan verməyəcəyi barədə tərəflər məlumatlandırılmalıdır. Əgər ultimatumlara reaksiya olmazsa, proseslər olduğu kimi davam edərsə və ya seçki keçirilərsə Azərbaycan o zaman müxtəlif təsirli vasitələrdən bu seçkinin qarşısını almaq üçün istifadə də bilər".