Həcc mövsümündə qanunsuz yerləşdirməyə qarşı ciddi tədbirlər görüləcək

Bütün növ səfər vizaları ilə Səudiyyə Ərəbistanına gələn şəxslərin Məkkə şəhərində və müqəddəs məkanlarda qalmasına şərait yaradanlara qarşı 100 min rialadək (30 min dollara yaxın) cərimə tətbiq olunacaq.

Avtosfer.az AZƏRTAC-a istinadən xəbər verir ki, bu, Səudiyyə Ərəbistanının Daxili İşlər Nazirliyinin bəyanatında əks olunub.

Qeyd olunur ki, səfər vizası sahiblərinin adıçəkilən yerlərdəki hotellərdə, mənzillərdə, şəxsi evlərdə, sığınacaqlarda və zəvvarların qalması üçün nəzərdə tutulan digər obyektlərdə yerləşdirilməsi, onların gizlədilməsi və ya qalmasına hər hansı formada kömək göstərilməsi qanun pozuntusu hesab olunur.

Bildirilib ki, qeyd olunan qaydalar zilhiccə ayının 14-də (may ayının sonunadək) olan müddətdə qüvvədə olacaq. Qanun pozuntusuna yol verənlərə tətbiq edilən cərimələr isə qayda pozan şəxslərin sayına uyğun olaraq artırılacaq. Bu tədbirlər həcc mövsümü çərçivəsində zəvvarların təhlükəsizliyinin təmin olunması üçün nəzərdə tutulub.