Horadiz Fatehi – Asif Məmmədovun hekayəsi

Torpaqlarımıza düşmən təcavüzü başlayanda ərazi bütövlüyümüzü qorumaqdan ötrü yüzlərlə polis əməkdaşı kimi döyüşə atılanlardan biri də Asif Məmməd oğlu Məmmədov olub.

Avtosfer.az xəbər verir ki, həmin ağır illərdə o, Füzuli Rayon Polis Şöbəsinin Post-Patrul Xidməti Bölüyünün komandiri, 1995-ci ildən isə Şəxsi heyətlə iş üzrə rəis müavini vəzifəsində xidmət edib. 

Azərbaycanın Milli Qəhrəmanları - Pəhlivan Fərzəliyevin və Nazim Quliyevin komandiri olan Asif Məmmədov Füzuli rayonunun Horadiz qəsəbəsinin və 23 kəndin işğaldan azad olunmasında həmkarları ilə birgə şücaətlər göstərib, düşmənə qan uddurub.

Qeyd edək ki, Asif Məmmədov 1954-cü ildə Füzuli rayonunun Kürdmahmudlu kəndində müəllim ailəsində doğulub. O, Azərbaycan Dövlət Pedaqoji İnstitutunda, daha sonra Polis Akademiyasında təhsil alıb. Sahə inspektoru kimi xidmətə başlayıb və Şəxsi heyətlə iş üzrə rəis köməkçisi vəzifəsinədək yüksəlib. 2010-cu ildə isə xidmətdə olmanın son yaş həddi ilə təqaüdə çıxıb, 2022-ci ilin iyulunda dünyasını dəyişib.

Qeyd edək ki, Asif Məmmədovun oğlu Azər Məmmədzadə də hazırda polis zabiti kimi xidmət göstərir.