İçkili halda “avtoşluq” edən şəxs AzTV-nin əməkdaşına bıçaq çəkdi - FOTO

Jurnalist Səbuhi Vaqifoğluna qarşı xuliqanlıq edilib. Avtosfer.az xəbər verir ki, o, bu barədə sosial şəbəkələrdə paylaşım edib. Belə ki, 10-NN-504 dövlət nömrə nişanlı, “Tofaş” markalı avtomobilin sürücüsü gecə saatlarında Sumqayıt şəhəri ərazisində məhəllədaxili yolda sürətlə hərəkət edib. Jurnalist isə ona iradını bildirib.

“Maşını dayandırdım və xahiş etdim ki, asta sürsün, məhəllədə balaca uşaq, ailə piyada gəzir, belə sürmək olmaz. Mənlə dirəşdi. Dedim ay qardaş özü də niyə içkili maşın idarə edirsən? Deyir əcəb edirəm, Prezident Aparatı belə, Polis belə (təhqir işlətdi). Gedib pulumu verib qurtaracam. Mənim acığıma maşını arxaya verib, yenidən sürətli gəldi, bu dəfə də etiraz edəndə bıçaq çıxardı üstümə. Bildirdi ki, hər gün belə gəlib keçirəm burdan, bundan sonra da belə edəcəm.”

Jurnalist qeyd edib ki, ətrafda təhlükəsizlik kameraları var. O, Daxili İşlər Nazirliyinə məsələ ilə bağlı müraciət edib.

Qeyd edək ki, Səbuhi Vaqifoğlu Azərbaycan Televiziyasının əməkdaşıdır. 

Daxili İşlər Nazirliyinin M\tbuat Xidmətindən Avtosfer.az-ın sorğusuna cavab olaraq bildirilib ki, hazırda məsələ araşdırılır və nəticəsi barədə ictimaiyyətə məlumat veriləcək.