Malların tədarükü üçün ən qısa yollar Azərbaycandan keçir

Çinlə uğurlu əməkdaşlığımızı nəzərə alaraq, biz gələcəkdə yaxşı perspektivlər görürük. Tranzit daşımaları əməkdaşlığımızın əsas istiqamətlərindən biridir.

Avtosfer.az “Azərtac”a istinadən xəbər verir ki, bunu Azərbaycan Respublikası Baş nazirinin müavini Şahin Mustafayev sentyabrın 26-da Bakıda Çin Xalq Respublikasının yaranmasının 75 illik yubileyinə həsr olunmuş tədbirdə deyib.

“Azərbaycanda tranzit potensialının artırılması istiqamətində nəqliyyat infrastrukturu istiqamətində irimiqyaslı layihələr həyata keçirilib. Ölkəmizdən keçən nəqliyyat dəhlizləri, Bakı Beynəlxalq Dəniz Ticarət Limanı, Bakı-Tbilisi-Qars dəmir yolu və digər layihələr Çindən Avropaya və əks istiqamətdə yüklərin daşınması üçün ən qısa və səmərəli nəqliyyat marşrutlarını təşkil edir. Nəticədə Azərbaycan regionun əsas nəqliyyat mərkəzinə çevrilib. Bütün sadalananlar Azərbaycanın Çin Xalq Respublikasının Sədri Si Cinpinin “Bir kəmər və bir yol” təşəbbüsünün reallaşmasına verdiyi mühüm töhfədir. Böyük İpək Yolu üzərində yerləşən Azərbaycan bu təşəbbüsü rəsmi olaraq dəstəkləyən ilk ölkələr sırasındadır. 2024-cü ilin yanvar-avqust aylarında Azərbaycan və Çin arasında tranzit daşımaların ümumi həcmi ötən ilin müvafiq dövrü ilə müqayisədə 228 faiz artıb. Hesab edirəm ki, biz Azərbaycan və Çin arasında hər iki istiqamətdə dəmir yolu daşımalarını artırmaqla Orta Dəhlizin ən mühüm hissəsi olan Trans-Xəzər Beynəlxalq Nəqliyyat Marşrutunun (TİTR) birgə təşviqinə xüsusi diqqət yetirməliyik”, - deyə Şahin Mustafayev əlavə edib.