Maşınla azyaşlını vuran sürücü ona 2 manat verərək qaçdı - FOTO

Bakının Binə qəsəbəsində “Mercedes” markalı avtomobil velosipedlə hərəkət edən azyaşlını vurub. Bu barədə baku.ws-ə azyaşlının ailə üzvü məlumat verib. Onun sözlərinə görə, 19 avqust tarixində baş verən hadisəni törədən sürücü uşağın səhhəti ilə maraqlanmaq əvəzinə uşağa 2 manat verərək ərazidən uzaqlaşıb. Bundan sonra azyaşlının vəziyyəti pisləşdiyi üçün yanına toplaşan adamlar təcili tibbi yardım çağırıblar. Həmin ərazidən keçən Təcili Tibbi yardım maşını azyaşlını Sabunçu rayon xəstəxanasına çatdırıb.

Daxili İşlər Nazirliyindən bildirilib ki, məsələ nəzarətdədir, sürücünün tapılması istiqamətində tədbirlər görülür.

Azyaşlının anası Səbinə Babaşova oğlunu vuran sürücünün tapılması üçün ictimaiyyətə müraciət edib: "Mənim oğlumu velosiped sürərkən maşın vurub. Oğlumu vuran adam axşamüstü uşağı yol kənarında qoyub xaincəsinə qaçıb. Uşaq bir neçə saat yol kənarında köməksiz qalıb. Beyin travması alan oğlumu xəstəxanaya koma vəziyyətində çatdırıblar. Hal-hazırda vəziyyəti stabil olsa da, hələ də baş və qulaq ağrılarından əziyyət çəkir. Oğlumun reabilitasiyası nə qədər sürəcək, bilmirik. Həmin insan da deməyə dilim gəlmədiyi bir məxluqun tapılmasına köməklik göstərməyinizi sizdən xahiş edirəm. Bəlkə, bu məqaləni oxuyan bir şahid tapılar. Cavabınızı səbirsizliklə gözləyirəm".