Niyə kondisionerdən istifadə yanacaq sərfiyyatını artırır? - Bunun qarşısını necə alaq?

Yayın sıxıcı istisində maşın sürərkən rahat olmaq üçün ilk seçimlərimizdən biri adətən kondisioneri işə salmaq və ya pəncərələri açmaqdır. Avtosfer.az xəbər verir ki, lakin bu seçimlərin yanacaq sərfiyyatına təsiri bəzən gözlənilməz nəticələrə səbəb ola bilir.

Məsələn, bir çox insanın düşündüyü kimi, avtomobildə kondisionerin işə salınması həqiqətən yanacaq sərfiyyatına təsir edirmi?

Əgər belədirsə, niyə belə bir vəziyyət yaranır? Yanacağın kondisionerlə nə əlaqəsi var? Gəlin izah edək.

Kondisionerin işləməsi alternator (generator) vasitəsilə mühərrikdən aldığı enerjini təmin etdiyi üçün bu, təbii ki, yanacaq sərfiyyatını artırır.

Lakin bu təsir avtomobilin yaşı, sürəti, ölçüsü, mühərrik gücü və xarici temperaturdan asılı olaraq dəyişir. Ümumi bir nəticə çıxarsaq deyə bilərik ki, kondisionerdən istifadə dizellə işləyən avtomobillərdə 100 kilometrə təxminən 1-1,5 litr, benzinlə işləyən avtomobillərdə isə 1-2 litr yanacaq sərfinə səbəb olur.

Kondisioneri yandırmaq daha səmərəlidir, yoxsa pəncərələri açmaq?

Avtomobildə kondisioner və pəncərənin açılması arasındakı səmərəlilik fərqi ümumiyyətlə avtomobilin sürətindən asılıdır. Şəhərdə dayanıb-getmə hərəkətində pəncərələrin açılması yanacağa qənaət edə bilər, çünki aşağı sürətlə aerodinamik sürtünmə effekti minimaldır. Lakin sürətiniz 80 km/saatı keçdikdə, pəncərələrin açılması aerodinamik müqavimət yaradacağından yanacaq sərfiyyatını artıracaq. Bu halda deyə bilərik ki, kondisionerdən istifadə daha qənaətcil ola bilər.

Avtomatik kondisioner sistemləri manual sistemlərə nisbətən yanacaq sərfiyyatı baxımından daha səmərəli ola bilər. Əl ilə işləyən kondisionerlərdə biz temperaturu tənzimləmək üçün kondisioneri yüksək gücdə işlədirik. Bu, daha çox yanacaq sərfinə səbəb ola bilər. Avtomatik kondisionerlər isə kabinə daxilindəki temperaturun xarici temperaturla müqayisədə sabit saxlanılmasında daha dəqiq və səmərəli işləyir.

Bu sistemlər ideal temperatura çatdıqda aşağı gücdə işləməyə davam edərək yanacaq sərfiyyatını 25% azalda bilər. Avtomobili işə saldıqdan dərhal sonra kondisioneri işə salmayın.

Avtomobili işə salan kimi kondisioneri işə salmaqdansa, əvvəlcə şüşələri açıb salonu havalandırmaq daha sağlam olardı. Çünki kondisionerin birbaşa işə salınması isti havanın daxil olmasına səbəb olacağı üçün daha pis nəticələrə səbəb olacaq.

Kondisionerin sirkulyasiya rejimində işlədilməsi həm də çöldən hava almaq əvəzinə kabin daxilindəki havadan istifadə etməklə enerji sərfiyyatını azaltmağa kömək edəcək.

Göründüyü kimi, avtomobildə kondisionerdən istifadənin yanacaq sərfiyyatına təsiri sürətinizə və sürmə şəraitinizə görə dəyişir.

Namiq Musayev