Quşla toqquşma hər il aviaşirkətlərə 1 milyard dollardan çox ziyan vurur - FOTO

Quşla toqquşma hər bir pilotun rast gələ biləcəyi haldır. Lakin bu toqquşmalar əksər hallarda insan tələfatı ilə nəticələnmir. AZAL təyyarəsinin də Aktauda qəzaya uğraması ilə bağlı ilk versiya məhz quşla toqquşma oldu. Sonradan bu iddianın cəfəng və manipulyasiya olması üzə çıxdı.

Avtosfer.az xəbər verir ki, Avstraliyanın Aviasiya təhlükəsizliyini araşdıran AAWHG təşkilatının statistikasına görə, 1988-ci ildən indiyədək quşla toqquşma nəticəsində 262 nəfər ölüb, 250 təyyarə sıradan çıxıb. Statistika Cənubi Koreyada ötən həftə baş verən qəzanı ehtiva etmir. təkcə ABŞ-də 1990-cı ildən indiyədk vəhşi heyvanla və ya quşla 292 minə yaxın toqquşma rəsmiləşdirilib. 

AAWHG-nin statistikasına görə, quşla toqquşma hər il aviaşirkətlərə 1,2 milyard dollar ziyan vurur. Toqquşma əsasən enmə və qalxma mərhələrində, xüsusən də 0-15 metr yüksəklikdə baş verir. Lakin uçuş vaxtı tam yüksəklikdə də nadir hallarda toqquşma ola bilər. Məsələn, 2021-ci ildə Fransada uçuş vaxtı təyyarənin qarabatdaqla toqquşması nəticəsində təlimatçı pilot və aviasiya məktəbinin 3 kursantı həlak olub. Lakin nəzərə alaq ki, qəzaya uğrayan DR400 təlim təyyarəsinin maksimal uçuş yüksəkliyi 3000 metrdir.

Vüqar Yaşaroğlu