Taksi sürücüsünü soyanlar tutuldular

Bakının Sabunçu rayonunda taksi sürücüsünə qarşı quldurluq edilib. Avtosfer.az xəbər verir ki, Bakıxanov qəsəbəsində şəxsiyyəti məlum olmayan 2 nəfər Vüqar Hüseynlinin idarə etdiyi “BMW” markalı avtomobilə sərnişin qismində əyləşərək, R.Qəmbərov küçəsinə gedəcəyini bildirib. Həmin ünvanda onlar Vüqar Hüseynlini bıçaqla hədələyərək 292 manatını və sənədlərini alıb hadisə yerini tərk ediblər. 

Sabunçu Rayon Polis İdarəsinin 13-cü polis bölməsi əməkdaşlarının həyata keçirdikləri əməliyyat-axtarış tədbirləri nəticəsində hadisəni törətmiş Qazax rayon sakini Şəhadət Məmmədov və oğlu, əvvəllər məhkum olunmuş Nemət Məmmədov tutulublar.

Ətraflarında aparılmış tədbirlərlə onların noyabrın 16-da Bakı şəhər sakini Vera Leşinskayanın 18 manatını və qızıl əşyasını soyğunçuluq yolu il almaları da müəyyən edilib.

Faktla bağlı araşdırma aparılır.