Yasamalda dövlət qurumu təbiətə qənim kəsilib – VİDEO

Avtosfer.az xəbər verir ki, paytaxtın Yasamal rayonu Hüseyn Cavid prospektində (H.Cavid 46) əkilən ağac Rayonu Mənzil Kommunal Təsərrüfat Birliyi tərəfindən məhv edilib.

Redaksiyamıza şikayət edən şəxs bildirib ki, ağacın yeri ilə bağlı qəribə hadisə də baş verib. Rayon sakini şikayətində bunları qeyd edib:

“Videodan da göründüyü kimi yolun kənarında çərçivəyə alınmış ərazinin içərisində ağac olub və 2 il bundan qabaq güclü külək nəticəsində ağac qırılıb. Qırıldıqdan bir ay sonra həmin ağacın yerinə hansısa qurum tərəfindən 0.5 metrlik şam ağacı gətirib basdırılıb, amma təəssüflər olsun ki, o ağac da quruyub. Sonradan mən bir vətəndaş olaraq hemin yerə zeytun ağacı alıb əkdim, təəssüf ki, qulluq etməyimə baxmayaraq o ağac da qurudu. Burda ağacların quruma səbəbi odur ki, köhnə ağacın kötüyü orda qalır və yeni ağac üçün torpaq sahəsi kifayət etmir".

Vətəndaş bildirib ki, 1 ay bundan əvvəl qırılmış ağacın kötüyündən yeni ağacın pöhrələndiyini görüb. “Həmin yeri taxta parçaları ilə çerçivəyə aldım ki, ağacı qoruyum, qulluq edim, böyüdüm. Qulluğumun nəticəsində həmin pöhrə yarım metrə qədər böyümüşdü. Amma çox çox təəssüflər olsun ki, Yasamal rayonunun “JEK2 müdiri və işçiləri gəlib çərçivələri söküb atdılar və böyüyən ağacıda dibindən qırıb apardılar”.

Vətəndaş həmçinin onu da qeyd edib ki, ağacın kəsilməməsi üçün çox xahişlər edib, lakin buna reaksiya verən olmayıb.

Səfər Əlizadə