Yol polisi Heydər Əliyevin adını daşıyan yolun problemini həll etmir - Sürücülər görün nə etdi - FOTO

Xırdalan şəhərində sürücüləri təhlükəyə salan problemi bir müddət əvvəl Avtosfer.az saytında işıqlandırdıq. Təəssüf ki, məsələ öz həllini hələ də tapmayıb.
Belə ki, Heydər Əliyev prospektində asfalt örtüyü dəyişdirildikdən sonra hərəkətin təhlükəsizliyi dərəcəsinin artırılması məqsədilə yolu ayırıcı zolaqla ayırdılar. Lakin ayırıcı zolağın kəsiyində maneəni bildirən müvafiq nişanlar (maneəni sağdan keçmə və işıqqaytarıcılı elementləri olan şaquli nişanlanma xətləri) təşkil edilmədi. Əsasən günün qaranlıq saatlarında həmin prospektlə hərəkət edən sürücülər ayırıcı zolağın kəsiyini görmədiyi üçün dəfələrlə qəzalarla və təhlükələrlə üzləşiblər.

Baş Dövlət Yol Polisi İdarəsinin Hərəkətin Təşkili Şöbəsinin hərəkətsizliyini görən sürücülər kərpicin üzərinə işıqqaytarıcılı elementi yapışdıraraq ayırıcı zolağın kəsiyinə qoyublar ki, qəzaların qarşısını alsınlar.

Ümid edirik ki, hərəkətin təşkili ilə məşğul olan səlahiyyətli şəxslər bu dəfə işıqlandırdığımız problemi nəzarətə götürərək sözügedən prospekti müayinə edəcək və ayırıcı zolağın bütün kəsiklərini qeyd etdiyimiz nişan və nişanlanma xəttləri ilə təmin edəcək.

Fərid