Yol polisini videoya çəkib təhqir edən sürücü həbs olundu - FOTO

Bu gün səhər saatlarında paytaxtın Mikayıl Müşfiq küçəsi,  3-cü kənar dairəvi yol ilə hərəkətə olan 90 TD 032 dövlət nömrə nişanlı,  "Opel" markalı avtomobilin sürücüsü vaxtında texniki baxışdan keçmədiyi və cərimə borcları olduğu üçün yol polisi tərəfindən saxlanılıb. Bu barədə Avtosfer.az-a Bakı şəhər Dövlət Yol Polisi İdarəsinin bölmə rəisi,  polis polkovniki Vaqif Əsədov məlumat verib. Bildirib ki, sürücü yol polisinin saxla işarəsinə tabe olmayaraq yoluna davam edib. Yol polisi sürücü Abduləzizov Varid Soltanəli oğlunu saxlamağa müvəffəq olub. Saxlanılma zamanı sürücü xuliqanlıq nümayiş etdirərək polisə tabe olmayıb. Mobil telefonunu çıxardaraq çəkiliş aparmaq istəyib və yol polisinə qarşı nalayiq ifadələr işlədib. Onun barəsində toplanmış materiallar, həmçinin özünün mobil telefon vasitəsilə apardığı çəkiliş aidiyyəti üzrə Yasamal rayon məhkəməsinə təqdim edilib.  Məhkəmənin qərarı ilə sürücü təqsirli bilinərək 30 gün müddətində inzibati qaydada həbs olunub. 
Qeyd edək ki, həbs olunan 30 yaşlı sürücü ailəlidir,  əslən Şamaxı rayonundandır. Bakı şəhərində tikintidə işləyir.

Fərid