Yollarda sürücülər üçün təhlükə - qoruyucu hissələr yoxdur - VİDEO

Magistral yolları bölən dəmir maneələrin bir çoxunun başlanğıc və bitişlərində sürücüləri xəbərdar edici işarə və hissələr olmalıdır. Ancaq müşahidələr göstərir ki, bəzi yollarda bunlar ya yoxdur, ya da qəzalar zamanı sıradan çıxandan sonra bərpa edilməyib. Bu olmayanda isə qəza zamanı avtomobil dəmir maneənin ucuna çırpılır və nəticə daha ağır olur.

Yol kənarlarındakı dəmir maneələrin əksəriyyətinin başlanğıc, ya da bitişən yerlərində qoruyucu hissə yoxdur. Bu isə sürücülər üçün təhlükəli hal deməkdir. Həm dəmir, həm də beton arakəsmələrin baş və ya sonlarında qoruyucu nişanlanma Yol hərəkəti haqqında qanunda da öz əksini tapıb. İşığı əks etdirən lövhə ilə yanaşı bir çox ölkədə həmin yerə su doldurulmuş plastik bidonlar yığışır. Ekspertlər xarici təcrübədən faydalanmağı tövsiyə edirlər.

Müşahidələr göstərir ki, bir çox yerdə belə nişanlar qəzalar zamanı sıradan çıxır və yenisi qoyulmur. "Azəryolservis"-dən bildirdilər ki, yollara baxış keçiriləcək və qoruyucu hissələr lazım olan yerə əlavə olunacaq.